【棋間限定-日本桌遊介紹】Not My Fault! （俗稱：IT狗的辛酸）
喺香港有一種職業，雖然人工未必好似掃地啊嬸又或者校工咁低人工，但係佢哋日常嘅工作同被人對待嘅情形就好似一隻動物咁，佢哋被稱為IT狗。
IT狗依一種職業曾經係城中引起一啲討論，比如咩隱世好老公best choice 頭十啊、香港隱藏高人工職業等等，其實通通所有都係一時炒作，佢地係香港甚少有機會受到別人嘅尊重……...................................嗱！又到咗我哋棋間限定桌遊介紹嘅時間啦，
今次依盒細細盒嘅遊戲係玩一班IT 從業員要喺Deadline 前完成個project比老細，而老細會成日問你哋進度，通常依類麻煩工作都會留番最後一刻先做，或者完全唔做！遊戲目的就係要夾份，喺個個都”扮”工嘅情況下成功瞞騙上頭實質工作進度，達到神不知鬼不覺嘅境界。
遊戲會以三十日為期限，每個回合玩家會抽一張牌決定你做咗幾多野，卡牌上標注嘅數字表示你工作做咗等於幾多日嘅進度。
每個同事回合結束果陣老細要求你哋完成嘅進度就會上升一次（圖中啡色進度方格），你嘅進度加埋之前所有其他同事嘅進度（你係唔知其他人做咗幾多野）究竟過唔過到骨，就係睇你申報完工作進度之後，有冇反骨仔篤背脊。如果篤出黎比老細發現你哋真係扮工，你就要做代罪羔羊 - 停職！
如果你怕比人出賣，你可以同老細自認衰仔拎warning 就算，但每人只限拎一次warning。依三十日期間究竟會有人受靶丫？定係有奇蹟出現三十日後有貨交呢？
依隻遊戲除左玩法過癮外，啲卡仲好好笑。其中一張卡入面有個角色放隻手上個冇插線嘅keyboard度訓著，係隔離有隻貓喺度打keyboard工作！？
如果你想體驗一下做IT從業員或者想一大班人輕輕鬆鬆想笑下玩下，依隻Not My Fault 就岩哂啦。
Comentários